کوئی بھی علمی ڈسپلن ایک مبلغ علمی (علمیات ) کے گرد تخلیق اور تشکیل پاتا ہے اس مبلغ علمی کو انگریزی زبان میں epistemology بھی کہتے ہیں ۔
اس کا مطلب یہ ھوتا ہے کہ کوئی بھی علمی ڈسپلن جب خام مواد کے بعد اپنے دوسرے اور اھم ترین مرحلے (تدوین اور تبویب )میں ڈھلتا ہے تو ایک مجموعی علمی عقلیت اور ذھنیت پروان چڑھتی ہے اور وہ تمام تر مرحلہ تدوین وتخلیق اسی مجموعی سانچے میں ڈھلا ھوا ھوتا ہے ۔
یہ اصول دنیا کے تمام غالب علمی ادوار میں کارفرما رہا اور اسی ٹکسال میں تمام علمی روایتیں تشکیل پائی ہیں ۔
اسلامی علوم جس ذہنیت اور عقلیت اور جس سانچے میں مدون ھوئے اس ذہنیت یا اس مبلغ علمی کو بجا طور پر ” #وقار #روایت ” سے تعبیر کر سکتے ہیں یعنی اسلامی علوم کے تمام تر شعبہ ہائے علمی کا مقام مرتبہ اور استناد اس روایت کے وقار کے ساتھ وابستہ رہا ہے اور جتنا جتنا روایت میں علو ، بلندی اور وقار بڑھتا رہا اتنا اتنا ھی اس اسلوب علمی کا وقار اور استناد بلند ھوتا گیا ۔
اسی مذکورہ “وقار روایت” کا اسلامی علوم میں اس قدر گہرا عمل دخل تھا کہ شاعری جیسے جمالیاتی علم کی جمع وتدوین میں بھی اس کا اس قدر باریک بینی سے خیال رکھا گیا کہ جاہلی ادب کی جب تدوین نوع کی گئی تو اس روایت کے سب سے بڑے عالم ” حماد ” کو ” حماد الروایہ ” کا نام دیا گیا یعنی وہ حماد جس نے الادب الجاہلی کی روایت کی اور اس کی روایت کردہ شاعری ، استناد کے سب سے بڑے درجہ پر فائز سمجھی گئی ۔
اس مذکورہ “وقار روایت” کے اظہار اور اس کے ابلاغ کے لیے جو اصطلاحات وضع کی گئی ان میں جو دو مرکزی اصطلاحات تھیں!
وہ ” حدثنا اور اخبرنا ” تھیں ۔
ھم کہے سکتے ہیں کے تمام تر دینی ادب اس اخبرنا اور حدثنا کے گرد گھومتا ہے اور اسی کے تناظر میں تشکیل پایا ہے ۔
اور جب آپ اس “اخبرنا اور حدثنا” کو دینی ادب سے نکال دیں گے تو پورا دینی ادب ھی غیر مستند اور بےبنیاد رہ جائے گا ۔
گزشتہ دو تین صدیوں کی فکر استشراق کا مرکزی محور اس بنیاد کو ڈھانے میں صرف ھوا اور انہوں نے اس وقار روایت کو ھی نشانہ پر رکھ کر علوم اسلامیہ کے متعلق اپنے تمام تر شکوک وشبہات پھلائے اور ان کا بنیادی وظیفہ یہی رہا ۔
مشتسرقین پر دو علمی ادوار آئے جسے قدیم اور جدید استشراقی فکر کہا جاسکتا ہے بیسویں صدی میں جب فواد سیزگین ، ڈاکٹر حمید اللہ ، مصطفی اعظمی جیسے لوگوں کی علمی کاوشیں سامنے آئیں تو وہ مستشرقین جو غیر متعصب تھے انہوں نے قدیم استشراقی فکر سے رجوع کر لیا اور علوم اسلامیہ کے متعلق گزشتہ دو سوسالوں کے شکوک وشبہات کو غلط قرار دیتے ھوئے جو اعتراضات قائم کیے تھے وہ تقریبا ختم کردیے ۔
لیکن اس دو سو سالہ قدیم استشراقی فکر کے برصغیر میں جو خوشہ چین اور مرعوب ذہنیتیں تھی وہ آج بھی انہیں قدیم اعتراضات کو اپنا کل علمی سرمایہ سمجھتے ہیں اور اسی کے چربے کو اپنے الفاظ میں ڈھال کر اپنی سکالرشپ کا رعب ڈالنے کی کوشش کرتے ہیں ۔
غامدی صاحب نے “اخبرنا اور حدثنا” کے خلاف جو زہر اگلا ہے وہ کوئی نئی بات نہیں ہے بلکہ سرسید ، پرویز ، تمنا عمادی ، حبیب کاندھلوی کی اسی دو سوسالہ متروک اور گھسی پٹی چرب زبانی اور ملمع سازی کا تسلسل ھی ہے اور دینی علوم کی بنیاد پر حملہ ہے ۔